Motî da Léonard
Èn årtike di Wikipedia.
Li motî da Léonard (k' on dit eto motî Linåd), c' est on motî fwait idêye pa idêye pa Lucien Léonard et eplaidî pal SLLW e 1969. Si vraiy tite, e francès, c' est “Lexique namurois; dictionnaire idéologique, d'après le dialecte d'Annevoie (D3), Bioul (D2) et Warnant (D19)”.
Eto, li motî da Léonard abate troes djaeyes d' on côp d' warokea.
Come li tite el dit bén, les accints notés, c' est les cis d' Annvoye, Biou et Warnin. Mins li Motî da Linåd riprind eto, e les marcant, les mots do Motî da Pirsoul k' i n' a nén rtrové låvå.
Li motî Linåd, c' est onk des gros motîs do walon. Il est scrît e sicrijha Feller, tot cnoxhant l' Motî da Haust. L' ortografeye a stî rispepieye pa Jean Guillaume. Les decidaedjes ortografikes des deus djins vont esse lomés "sistinme Feller a môde des Relîs namurwès".
Li motî est enimådjî avou des viyès fotos.
Li motî da Léonard fourit l' mwaisse soûmint do motî da Somme, la k' les dnêyes sont rarindjeyes par ôre alfabetike.
Il est rprins sol limero [C1] dins l' Djivêye des motîs do walon.
Al fén, gn a, avou, des tåves alfabetikes avou les cmons nos walons, des nos d' djins et di sacwants nos d' plaeces.
Gn a eto ene djivêye di sacwants mots francès k' i gn a l' ratournaedje divins. Eto, li "Motî Linåd" pout esse riwaitî come on ptit franwal, onk des sourdants do Franwal di Nameur.
[candjî] Motî da Linåd et rfondaedje do walon
C' est l' prumî gros motî do Namurwès la k' on-z a bén mostré l' diferince inte les mots ki si scrijhèt avou l' betchfessî å (rinåd, må) des cis ki si scrijhèt avou l' betchfessî ô (trô, èn ôte côp). Les deus sons si prononçnut parey dins l' Namurwès, et davance, on lzès scrijheut avou au : rinaud, mau, trau, on aute caup.
C' est dandjreus l' Jean Guillaume, ki cnoxheut bén l' adire inte les deus oyons, la k' i s' prononçnut diferinmint dins l' Eter-Sambe-et-Mouze (ô si prononce oû : on troû, èn oûte coûp), k' a stî les cåzes di ce scrijhaedje la, foirt ahessant po scrire li rfondou.
